एमजीएम विद्यापीठात 2 दिवसीय राष्ट्रीय पालि भाषा परिषद संपन्न झाली
“पालि : जन-जन की बोली”
छत्रपती संभाजीनगर | १४ ऑक्टोबर २०२५
महात्मा गांधी मिशन विद्यापीठाच्या डॉ. बाबासाहेब आंबेडकर सेंटर फॉर बुद्धिस्ट स्टडीज आणि भारतीय व विदेशी भाषा संस्था यांच्या संयुक्त विद्यमाने आयोजित दोन दिवसीय राष्ट्रीय परिषदेचा उत्साहपूर्ण शुभारंभ सोमवारी रुक्मिणी सभागृहात झाला.
या वर्षीच्या परिषदेला “पालि : जन-जन की बोली” ही थीम देण्यात आली असून, उद्घाटन सोहळ्यात संस्कृती आणि विद्वत्तेचा सुंदर मिलाफ पाहायला मिळाला.
✨ उद्घाटनाची आगळीवेगळी परंपरा
कार्यक्रमाचे वैशिष्ट्य म्हणजे उपस्थित मान्यवरांनी धम्मलिपी (ब्राह्मी) लिपीत पालि भाषेत आपल्या नावाच्या स्वाक्षऱ्या करून परिषदेला प्रारंभ केला — ही कल्पना उपस्थित सर्वांसाठी प्रेरणादायी ठरली.
या अभिनव पद्धतीने प्राचीन लिपी व भाषेचा गौरव तर झाला,च पण आधुनिक शैक्षणिक मंचावर तिचे पुनरुज्जीवनही अधोरेखित झाले.
🎓 मान्यवरांची उपस्थितीत
उद्घाटन सोहळ्यास प्रमुख पाहुणे म्हणून कुलपती श्री. अंकुशराव कदम, कुलगुरू डॉ. विलास सपकाळ, राष्ट्रसंत तुकडोजी महाराज नागपूर विद्यापीठाचे पाली-प्राकृत विभागप्रमुख प्रा. डॉ. भागचंद्र जैन, धम्मलिपी अभ्यासक अतुल भोसेकर, तसेच डॉ. आशिष गाडेकर, डॉ. भिखू आनंद, डॉ. संजय मोहड, प्रा. यश कश्यपायन, डॉ. रेखा शेळके, डॉ. जॉन चेल्लादुराई, डॉ. के. पी. सिंग आदी अनेक विद्वान, संशोधक आणि विद्यार्थी मोठ्या संख्येने उपस्थित होते.
🌸 पालि भाषेचा सन्मान — विचारवंतांचे प्रतिपादन
कुलपती श्री. अंकुशराव कदम यांनी पालि भाषेचे महत्त्व स्पष्ट करताना सांगितले की,
“पालि ही केवळ भाषा नसून ती ज्ञान, करुणा आणि मानवतेचा झरा आहे. बुद्धांचे तत्वज्ञान या भाषेत साकारले आहे. म्हणूनच एमजीएम विद्यापीठ पालि अभ्यासासाठी व संशोधनासाठी सातत्याने प्रयत्नशील आहे.”
कुलगुरू डॉ. विलास सपकाळ म्हणाले,
“एमजीएम विद्यापीठात आठ प्रमुख भाषा शिकवल्या जातात मराठीपासून फ्रेंचपर्यंत आणि आता पालि त्यात एक तेजस्वी घटक म्हणून उदयास आली आहे. या परिषदेमुळे विद्यार्थ्यांना बहुभाषिक अभ्यासाची दिशा आणि संशोधनाचे नवे दालन खुले होत आहे.”
तर प्रा. डॉ. भागचंद्र जैन यांनी पालि भाषेच्या ऐतिहासिक प्रवासाचा मागोवा घेत सांगितले,
“जेव्हा बोली भाषेत साहित्यासंपदा निर्माण होऊ लागते, तेव्हा ती बोली भाषा ‘भाषा’ म्हणून मान्यता मिळवते. पालि भाषेने हा प्रवास यशस्वीपणे पार केला असून भारतीय विचार, कला आणि अध्यात्म जगभर पोहोचवले.”
🌿 कार्यक्रमाचे आयोजन
प्रास्ताविक डॉ. जॉन चेल्लादुराई यांनी सादर केले,
सूत्रसंचालन डॉ. रिहाना सय्यद यांनी सुंदरपणे केले,
तर आभार प्रदर्शन डॉ. रेखा शेळके यांनी मान्यवरांचे आभार मानत केले.
या दोन दिवसीय परिषदे दरम्यान देशभरातील संशोधक आपले निबंध सादर करणार असून, “पालि भाषा — लोकांची भाषा” म्हणून तिचा गौरव आणि अभ्यास अधिक विस्ताराने करण्याचे उद्दिष्ट यामागे आहे.
Discover more from Learn Pali ! Learn Buddha
Subscribe to get the latest posts sent to your email.