येवला येथे धम्मलिपि प्रशिक्षण — इतिहासाशी एक नातं जोडणारा उपक्रम

धम्मलिपी प्रशिक्षक – सुनील खरे

धम्मलिपी प्रशिक्षक सुनील खरे सर यांनी व्यक्त केलेले मत

येवला (ता. नाशिक) —
डॉ. बाबासाहेब आंबेडकरांनी 13 ऑक्टोबर 1935 रोजी येवला येथे धर्मांतराची ऐतिहासिक घोषणा केली होती — “ज्या धर्मात समानतेची वागणूक मिळत नाही, तो धर्म धर्म नाही.”
त्याच पवित्र भूमीवरून बाबासाहेबांनी समतेचा संदेश दिला आणि सतत 21 वर्षांच्या अभ्यासानंतर अखेर 14 ऑक्टोबर 1956 रोजी बौद्ध धम्माची दीक्षा घेतली.

या पवित्र भूमीने माझ्या आयुष्यालाही नवे वळण दिले, असे मत धम्मलिपी प्रशिक्षक सुनील खरे सरांनी व्यक्त केले.
सन 1995 ते 1997 या काळात मी येवला येथे 8वी ते 10वी पर्यंतचे शिक्षण घेतले आणि येथील वसतिगृहात तीन वर्ष वास्तव्यास होतो. त्याच काळात “मुक्तीभूमी” पाहण्याचा योग आला आणि इतक्या मोठ्या संख्येने लोक येथे का येतात, याची जाणीव झाली, असे त्यांनी सांगितले.

खरे पुढे म्हणाले, “योगायोग असा की, याच वसतिगृहात मला धम्मलिपि शिकवण्यासाठी आमंत्रित करण्यात आले. आमचे मोठे बंधू आदरणीय शरद शेजवळ सर यांच्या आग्रहाखातर मी 3 ऑक्टोबर रोजी नाईट शिफ्ट पूर्ण करून, 4 ऑक्टोबरला माझ्या मुलासह येवल्याला पोहोचलो.”

शरद शेजवळ सर ग्रामीण भागातील गरजू व गरीब विद्यार्थ्यांना स्पर्धा परीक्षांत पुढे जाता यावे म्हणून सातत्याने प्रयत्नशील आहेत. त्यांच्या या ध्येयदर्शी कार्याचा एक भाग म्हणून हा धम्मलिपि प्रशिक्षण उपक्रम राबविण्यात आला.

पूर्ण दिवस चाललेल्या या प्रशिक्षणानंतर विद्यार्थ्यांच्या चेहऱ्यावर समाधानाची रेषा स्पष्ट दिसत होती. “धम्मलिपीचे ज्ञान म्हणजे संस्कृती, इतिहास आणि स्वतःच्या ओळखीशी पुन्हा जोडले जाण्याची अनुभूती — हेच या उपक्रमाचे खरे यश,” असे सुनील खरे सरांनी नमूद केले.